[娛樂] 陳嘉桓素顏報警 (附雜誌詳細報導)

陳嘉桓硬食攬錫：我有推開！

陳嘉桓前晚在內地遇上不愉快事件，遭馬德鐘與陳浩民喝醉後攬攬錫錫，嚇到她先推開兼掩面！兩人事後自知失儀，向她說不好意思！

身在內地橫店的陳嘉桓（Rose）忙於拍攝電影《笑功震武林》，同片還有洪天明等。由於當地有不同劇組開工，其中不乏香港演員，故大夥兒不時相約吃飯。前晚，Rose、洪天明、方中信、陳浩民、馬德鐘、樊少皇、葉璇、孟瑤與一班工作人員食飯，由於剛巧是其中一位工作人員生日，Rose、孟瑤、洪天明、陳浩民、馬德鐘與一些工作人員於飯後唱K慶祝。席間，有人不斷叫Rose飲酒，但她以年紀還小為由拒絕。唱完K後，一班人再到燒烤店消夜，孟瑤並冇跟隨，洪天明則醉到「斷片」，陳浩民與馬德鐘亦醉到玩出火！

醉後的馬德鐘鬧着玩，一度玩到攬錫Rose，陳浩民則欲咀面及嘴，嚇到剛滿十九歲的她不知所措！Rose先以手擋開，再以手遮面並大呼：「唔好玩啦！」工作人員見勢色不對即拉開兩人，他倆事後為失儀事件跟Rose致歉。
經理人：有人禽獸不如

記者就此向陳嘉桓求證，問到是否被飲醉的馬德鐘與陳浩民又攬又錫，她說：「中間確實發生過！我有推開！可能佢哋飲醉咗，有啲誤會。（佢哋有同你道歉？）佢哋有同我講唔好意思，只希望呢啲不愉快嘅情況唔好再發生。出去食飯經常都係一大班人，識得保護自己，但都搞成咁，以後真係要避免同啲飲醉酒嘅人接觸！（發生後有冇好嬲同唔開心？）唔開心一定有，諗唔到會有咁嘅事發生，希望以後唔會再發生。」

至於Rose經理人冼國林表示暫時只了解部分情況，但已極之憤怒！他怒斥有人禽獸不如，欺凌弱女：「等我了解晒成件事，若果係好嚴重嘅話，我絕對唔會手軟，一定立即採取法律行動同報警，依家搜集資料及徵詢律師意見。」他又斥責Rose欠機心：「我鬧咗佢成粒鐘，叫佢唔好太天真，唔好睇得咁表面，佢真係好蠢！今次當係吸取教訓。」杜宇航則說︰「尋日冇同佢哋食飯，唔知發生咩事。今日見過Rose，傾咗兩句睇唔到佢有異樣。」

陳浩民

身在內地的陳浩民昨日對被指攬錫陳嘉桓（Rose）一事，他表現得很錯愕說：「我做過啲乜嘢呀！（女方承認你事後有同佢講唔好意思？）點解要同佢講唔好意思！我哋尋晚係去消夜，現場有老闆、助理喺度，眾目睽睽下我做得乜嘢出嚟？（有冇攬錫？）冇！點會呀？最多咪哄埋佢耳邊講嘢，搭下膊頭，如果咁嘅接觸佢都覺得唔舒服，我咪打電話同佢講唔好意思囉！因為我完全冇心對佢做唔尊敬嘅事！（係咪飲醉酒？）飲少少，但我清醒，我仲揸電單車返屋企！（老婆知道？）唔知，我都好擔心你哋會點寫，因為我老婆就快生，一陣嚇到佢早產！」

馬德鐘

馬德鐘: 後悔沒有及時制止陳浩民
就當晩之事件，浩民因醉酒確有行為不當之處。本人亦後悔沒有及時制止。而及後安慰陳嘉桓的行為令人產生誤會，就此要向嘉桓說聲對不起。本人已跟陳嘉桓的經理人如實解釋，並得到冼師傅及陳嘉桓諒解，明白此乃誤會。
鑒於此事已引起社會人士不安，所以本人亦準備效法冼師傅經常樂善好施的義舉，捐款予東華三院作慈善用途，回饋社會，造福社群。

阿嬌

阿嬌gillian：@陳嘉桓Rose 我支持你 某某已經不是第一次有這樣的行為 所以你一定要好好的保護自己

資料來源 : hihiforum